الفطر ألاسود

 الفطر ألاسود

حابة نتكلم النهاردا عن موضوع كان شاغل بال معظمنا الفترة الي فاتت  .. وكان ومازال حديث الساعة زي ما بيقولوا (الفطر الاسود) 

 هنوضحه شوية ونفهم ايه هو ..وطرق انتشاره علاجه الوقاية منه .

⬅️ايه هو الفطر الاسود؟

هو عدوي فطرية  بتصيب اي جهاز في الجسم  وبتكون ناتجة لتعرض لعفن سواء كان في الاكل او السماد .

⬅️هو كان موجود قبل كدا ولا لسا الي منتشر حديثا ؟

هو كان موجود قبل كدا ووجوده نادر جدا بس خطير ..ليه انتشر حاليا كلام عنه 

لان الفطر الاسود بينتشر او سهل انه يصيب أصحاب المناعة الضعيفة قبل كدا كان بيصيب أصحاب الامراض المزمنة مرضي السكر.. مرضي السرطان .. 

_ ربنا يعافينا جميعا ويشفي كل مريض يارب _ ومع وجود فيرس كورونا  واستخدام العقاقير دا شيء يضعف المناعة جدااا فبالتالي أصبح له أحتمالية حدوث أكبر .

⬅️طيب أيه اعراضه؟

بم انه بسبب فطريات فهو ممكن يظهر ع اي جزء من الجسم وله أعراض مختلفة

١_الحمى.

2- تورم الوجه من جانب واحد.

3- صداع.

4- احتقان الأنف أو الجيوب الأنفية.

5- آلام في الصدر.

6- ضيق في التنفس.

ولو حصل اصابة  للغشاء المخاطي الجهاز الهضمي، ممكن تظهر  بعض الأعراض مثل:

1- آلام في البطن.

2- غثيان وقيء.

3- حدوث نزيف في الجهاز الهضمي.

⬅️طيب هل بينتشر بين الاشخاص والحيوانات؟ 

أكد دكتور مجدي بدران، عضو الجمعية المصرية للحساسية والمناعة، أن "الفطر الأسود" ليس بمرض معد، وبالتالي لا يمكن أن ينتقل بين البشر والحيوانات، ويصاب الأفراد بهذه العدوى عن طريق التعرض للفطريات في البيئة إذا تم استنشاقها، يمكن أن تصيب الفطريات الرئتين أو الجيوب الأنفية، ويمكن التقاطها عن طريق الاستنشاق أو عند ملامستها جلد مفتوح من خلال جرح أو حرق عن طريق الجلد، ويمكن أن تنتشر العدوى لاحقا إلى مجرى الدم، وتصل إلى أعضاء مثل الدماغ والقلب والطحال أيضا.

⬅️طيب هل يوجد علاج او طرق وقاية منه ؟

هو اولا وأخيرا في كل أمور حياتنا ربنا هو الحافظ ولكن نأخد بالاسباب 

علاجه بيعتمد علي سرعة اكتشافه كل ما أكتشف بشكل سريع كل ما الوضع بقي احسن ويتلحق لان الخوف يوصل للمخ ..

بيكون له علاج مضادات للفطريات والعمل علي تعزيز المناعة ..وفي مراحل متأخر بيتم استئصال الجزء الي اتصاب منعا لانتشاره .ربنا يعافينا جميعا .

⬅️طيب نعمل ايه ؟

هنعمل نفس الحاجات الي كلنا بنعملها بس هنركز اكتر وأكتر مش هنعمل حاجة جديدة علينا .

في بعض التوصيات منتشرة في اكتر من موقع 

الا وهي :

⏺تعزيز المناعة بالاكل الصحي .

⏺غسل الايد بشكل صحيح وكويس جدا مش بس قبل الاكل وبعده قبل ملامسة اي جزء من الجسم الحرص علي النظافة بشكل مستمر .

⏺التأكد من غسيل الاكل بشكل صحيح.

⏺التخلص السريع من اي أكل غير طازج او بدأ يظهر عليه اي تعفن (خصوصا احنا في الصيف والاكل بيفسد بسرعة)

⏺تهوية الثلاجة والحرص علي نظافتها .

⏺عدم استخدام اي مضادات حيوية او عقاقير طبية دون داع والرجوع للاطباء.

⏺عدم الهلع والخوف المستمر لان دا بيضعف المناعة .

واخيرا وليس أخرا الاصابة بمرض او اي حاجة في الدنيا ما هي الا قدر ونصيب ..فبلاش نوتر نفسنا ونخاف نأخد بالاسباب و ونعمل الي علينا وربنا خير حافظ ..ربنا يعافينا جميعا ويشفي كل مريض

المراجع:

https://www.bbc.com/arabic/trending-57220319

https://www.skynewsarabia.com/technology/1443714-%D9%8A%D8%B5%D9%8A%D8%A8-%D8%A7%D9%84%D9%81%D8%B7%D8%B1-%D8%A7%D9%84%D8%A7%D9%94%D8%B3%D9%88%D8%AF-%D8%A7%D9%84%D8%A7%D9%94%D8%B7%D9%81%D8%A7%D9%84%D8%9F

By: Reem Reda